Wednesday, December 23, 2020

រាជរដ្ឋាភិបាល​បន្ត​លើក​លែង​ពន្ធប្រថាប់ត្រា​សម្រាប់អ្នកទិញ​ផ្ទះ​ដែលមាន​ថ្លៃទាប​ជាង ឬ​ស្មើ៧ម៉ឺន​ដុល្លារ

 

យោង​តាម​សេចក្តីប្រកាស​ព័ត៌មាន​របស់​រាជរដ្ឋាភិបាល ដែលផ្សព្វផ្សាយ​នៅថ្ងៃនេះបាន​បញ្ជាក់ថា រាជរដ្ឋាភិបាល​នឹង​បន្ត​លើក​លែង​ពន្ធ​ប្រថាប់ត្រា​សម្រាប់​អ្នកទិញផ្ទះ​ដែលមាន​ថ្លៃទាប​ជាង ឬស្មើ៧ម៉ឺនដុល្លារអាមេរិក ដោយ​គិត​ពីខែមករា ឆ្នាំ​២០២១ ដល់ដំណាច់​ខែធ្នូ ឆ្នាំ​២០២១ ពីក្រុមហ៊ុន​អភិវឌ្ឍន៍​លំនៅដ្ឋាន​ដែលចុះ​បញ្ជី​នៅ​ក្រសួងសេដ្ឋកិច្ច និង​ហិរញ្ញវត្ថុ ឬ​នៅ​តាម​មន្ទីរ​សេដ្ឋកិច្ច និង​ហិរញ្ញវត្ថុ។

ទន្ទឹមនេះ រាជរដ្ឋាភិបាលក៏​អំពាវនាវ​​ដល់​ក្រុមហ៊ុន​អភិវឌ្ឍន៍​លំនៅដ្ឋាន​ទាំងអស់ ចូលរួម​ជាមួយ​រាជរដ្ឋាភិបាល​ក្នុង​ការ​បញ្ចុះ​ថ្លៃផ្ទះ ទៅ​តាម​លទ្ធភាព​ដែលអាច​ធ្វើ​ទៅបានផងដែរ។

សូម​បញ្ជាក់ថា ការសម្រេចរបស់រាជរដ្ឋាភិបាល​បន្តមិន​យក​ពន្ធ​ប្រថាប់ត្រា​សម្រាប់អ្នកទិញ​ផ្ទះ​ដែលមាន​តម្លៃទាប ឬ​ស្មើ​នឹង​៧ម៉ឺន​ដុល្លារនេះ គឺជា​ផ្នែក​មួយ នៃវិធានការ​បន្ថែម ជុំទី៧ ​ក្នុង​ការ​បន្ត​គ្រប់​គ្រង​ផល​ប៉ះពាល់​លើ​វិស័យ​សំខាន់ៗ នៃ​សេដ្ឋកិច្ច ក្នុង​បរិការណ៍ នៃវិបត្តិជំងឺកូវីដ​១៩។

ក្រៅពីនេះ រាជរដ្ឋាភិបាលក៏​បន្ត​ជួយ​ទំនុក​បម្រុង​ដល់ជីវភាព​ប្រចាំថ្ងៃ​របស់​គ្រួសារ​ក្រីក្រ និង​ងាយ​រងគ្រោះ​តាម​រយៈ​កម្មវិធី​ឧបត្ថម្ភ​សាច់ប្រាក់ ដើម្បីឆ្លង​កាត់​ដំណាក់​កាល​ដ៏​លំបាក នៃវិបត្តិ​ជំងឺកូវីដ​១៩ផងដែរ៕

0 Reviews:

Post a Comment