ជំនួយវ៉ាក់សាំងកូវីដ១៩ របស់ប្រទេសចិនចំនួន ៦០ម៉ឺនដូស ដែលគេដឹងថា មានឈ្មោះ ស៊ីណូហ្វាម (SINOPHARM) មកដល់ប្រទេសកម្ពុជានៅល្ងាចថ្ងៃទី៧ ខែកុម្ភៈ ឆ្នាំ២០២១។ តើមនុស្សប្រភេទណាដែលមិនអាចទទួលបានវ៉ាក់សាំងប្រភេទនេះ?
បើតាមការបញ្ជាក់របស់លោកស្រី ឱ វ៉ាន់ឌីន អ្នកនាំពាក្យក្រសួងសុខាភិបាល បានបញ្ជាក់ថា មានបុគ្គល៩ជំពូក ដែលមិនអាចចាក់វ៉ាក់សាំងកូវីដ-១៩ នេះបាន។
ក្នុងនោះ ទី១ មានប្រតិកម្មជាមួយសារធាតុក្នុងវ៉ាក់សាំង មានន័យថា បុគ្គលនោះគាត់មាន អាលាក់ស៊ី ហើយដែលគាត់ធ្លាប់មានប្រវត្តិប្រតិកម្មជាមួយវ៉ាក់សាំងផ្សេងៗ។ ព្រោះយើងមិនមែនចាក់តែវ៉ាក់សាំងកូវីដ-១៩ទេ កន្លងមក៣០ឆ្នាំ ទៅ៤០ឆ្នាំមកនេះ យើងធ្លាប់ចាក់វ៉ាក់សាំងច្រើនហើយ។ អ៊ីចឹងបើបុគ្គលគាត់មានប្រវត្តិចាក់ វ៉ាក់សាំងទៅមាន អាលាក់ស៊ី គាត់ត្រូវជម្រាបគ្រូពេទ្យដើម្បីកុំឱ្យមានបញ្ហា។ មួយទៀត អ្នកដែលមានបញ្ហាផ្លូវដង្ហើម គាត់ពិបាកដកដង្ហើម ឬក៏អ្នកហ្នឹងគាត់មានការហើម ឬរលាករសៃឈាម និងអ្នកកំពុងចេញកន្ទាលក្រអាក ក៏មិនអាចចាក់បានដែរ។
ទី២ គឺអ្នកកំពុងទទួលការឈឺចាប់ពីជំងឺទាន់ហន់ណាមួយ ជាពិសេសគឺជំងឺរ៉ាំរ៉ៃធ្ងន់ធ្ងរ ឬដែលកំពុងក្ដៅខ្លួនដោយសារជំងឺរ៉ាំរ៉ៃទាំងនោះ។
ទី៣ គឺស្ត្រីមានផ្ទៃពោះ និងស្ត្រីក្នុងរយៈពេលបំបៅដោះ ឬស្ត្រីមានផែនការពរពោះក្នុងរយៈពេល៣ខែ។
ទី៤ អ្នកមានជំងឺប្រកាច់ កន្ត្រាក់ ឆ្កួតជ្រូក ឬស្កន់ អ្នកជំងឺសរសៃប្រសាទ ឬរលាកស្រោមខួរ ឬអ្នកមានជំងឺតំណពូជ។
ទី៥ អ្នកដែលពិនិត្យទៅឃើញមានជំងឺកង្វះភាពស៊ាំពីកំណើត អ្នកជំងឺ HIV(អេដស៍) អ្នកជំងឺមហារីកកូនកណ្ដុរ និងអ្នកជំងឺឈាមស។
ទី៦ អ្នកដែលសង្ស័យថា មានជំងឺប្រព័ន្ធដង្ហើមធ្ងន់ធ្ងរ អ្នកជំងឺបេះដូង សរសៃឈាម ជំងឺថ្លើមធ្ងន់ធ្ងរ ជំងឺតម្រង់នោម និងដុះដុំសាច់មហារីកធ្ងន់ធ្ងរ។
ទី៧ អ្នកដែលប្រើប្រាស់ថ្នាំសម្រួលភាពស៊ាំប្រឆាំងជំងឺមហារីកដុំសាច់។
ទី៨ អ្នកមានប្រវត្តិធ្លាប់ឆ្លងជំងឺកូវីដ១៩។
និង ទី៩ អ្នកដែលត្រូវបានគ្រូពេទ្យព្យាបាល ឬបុគ្គលិកផ្ដល់វ៉ាក់សាំងបញ្ជាក់ថា មិនគួរទទួលវ៉ាក់សាំង៕
0 Reviews:
Post a Comment