អាជ្ញាធរខេត្តព្រះសីហនុ សម្រេចបិទសណ្ឋាគារ៥កន្លែង ក្រោយរកឃើញស្រ្តីជនជាតិចិន២នាក់ផ្ទុកកូវីដ-១៩

សូមអានបន្ត

រដ្ឋបាលខេត្តព្រះសីហនុកាលពីថ្ងៃម្សិលមិញ បាន​សម្រេចបិទសណ្ឋាគារជីនប៉ីទាំង៣សាខា និងអគារស្នាក់រួម របស់ បុគ្គលិកក្រុមហ៊ុនជីនប៉ីក្រុងព្រះសីហនុ ព្រមទាំងសណ្ឋាគារហ័ងហ្គ័នជាយី ក្រោយរកឃើញស្រ្តីជនជាតចិនចំនួន២នាក់ មានផ្ទុកជំងឺកូវីដ-១៩។

តាមសេចក្តីជូនដំណឹងរបស់រដ្ឋបាលខេត្តព្រះសីហនុថា កាលពីថ្ងៃទី១២ ខែកុម្ភៈ ឆ្នាំ២០២១ កន្លងទៅនេះ ក្រុមឆ្លើយតបបន្ទាន់នៃមន្ទីរសុខាភិបាលខេត្ត បានយកសំណាកពីជនបរទេសដែលស្នាក់នៅក្នុង ក្រុងព្រះសីហនុ ហើយលទ្ធផលតេស្តបានបញ្ជាក់ថា មានវិជ្ជមានវីរុសកូវីដ-១៩ចំនួន២នាក់ ដែលមានស្ត្រីជនជាតិចិនអាយុ៣៥ឆ្នាំ មកពី រាជធានីភ្នំពេញ កាលពីយប់ថ្ងៃទី១៦ ខែកុម្ភៈ ឆ្នាំ២០២១ តាមរថយន្ត Alphard ស្លាកលេខៈ ៤៥៤៦ ហើយស្នាក់នៅសណ្ឋាគារ ជីនប៉ិព័រអ៊ី ស្ថិត នៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ និងស្ត្រីជនជាតិចិនម្នាក់ទៀត អាយុ២២ឆ្នាំ មកពីរាជធានីភ្នំពេញកាលពីយប់ថ្ងៃទី២០ខែកុម្ភៈឆ្នាំ២០២១ តាមរថយន្តជាមួយអ្នកបើកបរ ហើយស្នាក់នៅសណ្ឋាគារហ័ងហ្គ័នជាយី ស្ថិតនៅភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ជាមួយសង្សារ។

បច្ចុប្បន្ន ស្ត្រីជនជាតិចិនទាំង២នាក់ ត្រូវបានដាក់នៅដាច់ដោយឡែក និងផ្តល់ការព្យាបាលនៅមន្ទីរពេទ្យបង្អែក ខេត្តព្រះសីហនុ។

រដ្ឋបាលខេត្តព្រះសីហនុ ក៏​អំពាវនាវដល់អ្នកធ្លាប់មានវត្តមានចេញចូលនៅសណ្ឋាគារជីនបុីទាំង៣សាខា និងអគារ ស្នាក់នៅរួមរបស់បុគ្គលិកក្រុមហ៊ុនជីនប៉ី ចាប់ពីយប់ថ្ងៃទី១៦ ខែកុម្ភៈ ឆ្នាំ២០២១ និងសណ្ឋាគារហ័ងហ្គ័នជាយី ចាប់ពីយប់ថ្ងៃទី២០ ខែកុម្ភៈ ឆ្នាំ២០២១ ឬដឹងថាខ្លួនជាអ្នកប៉ះពាល់ជាមួយបុគ្គលទាំងពីរខាងលើ ត្រូវមានភាពស្មោះត្រង់ មិនលាក់លៀម និងស្ម័គ្រចិត្តមកធ្វើតេស្តរកមេរោគកូវីដ-១៩ ឱ្យបានទាន់ពេលវេលា ហើយត្រូវទៅជួបក្រុមឆ្លើយតបបន្ទាន់នៃមន្ទីរសុខាភិបាលខេត្តព្រះសីហនុ ដែលប្រចាំការនៅសាលាបឋមសិក្សា- អនុវិទ្យាល័យ តេជោសែន កម្មករ ស្ថិតនៅវិថីឯករាជ្យ សង្កាត់លេខ៤ ក្រុងព្រះសីហនុ ខេត្តព្រះសីហនុ ចាប់ពីវេលាម៉ោង១៣រសៀល ថ្ងៃទី២៤ ខែកុម្ភៈឆ្នាំ២០២១តទៅ ដើម្បីក្រុមការងារពិនិត្យយកសំណាកធ្វើតេស្តរកវីរុសកូវីដ-១៩ និងធ្វើចត្តាឡីស័កចំនួន១៤ថ្ងៃ តាមការកំណត់របស់ក្រសួងសុខាភិបាល។

សូម​បញ្ជាក់ដែរថា ​នៅព្រឹក​ថ្ងៃទី២៤ ខែកុម្ភៈ ឆ្នាំ​២០២១ ក្រសួងសុខាភិបាលបានប្រកាស​ថា គេបានរកឃើញមនុស្សសរុបចំនួន ៤០នាក់ទៀតមានផ្ទុកវីរុស​កូវីដ១៩ ក្នុងនោះ ៣៨នាក់ គឺជាករណីព្រឹត្តិការណ៍​សហគមន៍​២០កុម្ភៈ ដែលធ្វើ​ឲ្យ​ចំនួនអ្នកឆ្លងក្នុងសហគមន៍បានកើនដល់ ១៣៧នាក់ ហើយ​មានទីតាំងប្រមាណ៥០កន្លែងដែលពាក់ព័ន្ធនឹងការឆ្លងត្រូវបានបិទ៕