ហៅកម្មករផ្ទះសំណាក់ចូលបន្ទប់រួចរឹតកសម្លាប់ ដើម្បីកាត់សោរលួចម៉ូតូ

សូមអានបន្ត

កាលពីវេលាម៉ោងប្រមាណ ជិត៦ព្រឹក ថ្ងៃទី២៨ ខែមករា ឆ្នាំ​២០២១នេះ មាន​ករណីភ្ញាក់ផ្អើល​នៅ​ផ្ទះសំណាក់ យីហោ ៣៦២ ស្ថិត​ក្នុង​ភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល ក្រោយ​ពី​កម្មករ​ផ្ទះសំណាក់​នោះ​ម្នាក់​ត្រូវ​គេ​រឹតកសម្លាប់​នៅ​ក្នុង​បន្ទប់។

យោង​តាម​របាយការណ៍​សមត្ថកិច្ច​ថា ជនរងគ្រោះ មានឈ្មោះ ចាន់ សុខឃាង ភេទប្រុស អាយុ១៥ឆ្នាំ មុខរបរ បុគ្គលិក ផ្ទះសំណាក់៣៦២  ជនជាតិខ្មែរ ស្នាក់នៅ កន្លែងកើតហេតុ ។

របាយការណ៍​បញ្ជាក់ថា នៅមុនពេលកើតហេតុ មានជនសង្ស័យ០២នាក់ បាននាំគ្នាដើរមក ផ្ទះសំណាក់៣៦២  រួចហើយជួលបន្ទប់លេខ៧ ដេកស្នាក់នៅ តែខាងអ្នកមើលការខុសត្រូវ ផ្ទះសំណាក់មិនបានកត់ឈ្មោះ ឬ ទាមទារ យកអត្តសញ្ញាណប័ណ្ណសំគាល់ខ្លួនឡើយ។

រហូតមកដល់វេលាម៉ោង០៣.៣០នាទី រំលងអាធ្រាត្រ នាថ្ងៃទី២៨ខែមករា ឆ្នាំ២០២១ ជនសង្ស័យបានហៅជនរងគ្រោះ ឲ្យចូលក្នុងបន្ទប់លេខ៧ ហើយនាំគ្នាចាប់សង្កត់ដៃជើង និងយកកន្សែងរឹតខ្ទប់មាត់រហូតដល់ដាច់ខ្យល់ស្លាប់ បន្ទាប់មកនាំគ្នាចេញពីបន្ទប់ រួចចាក់សោរ បន្ទប់ពីក្រៅជាប់ ហើយនាំគ្នាកាត់សោរច្រវ៉ាក់ យកម៉ូតូរបស់ម្ចាស់ផ្ទះសំណាក់ ជិះគេចខ្លួនបាត់ទៅ។

លុះព្រឹកឡើងថ្ងៃទី២៨.០១.២០២១ វេលាម៉ោង០៥.៣០នាទី ឈ្មោះអឿន សុជាតិ ភេទស្រី អាយុ២៩ឆ្នាំ ដែលជាម្ទាស់ផ្ទះសំណាក់ បានក្រោកពីដំណេក ក៏ស្រាប់តែបាត់ម៉ូតូម៉ាកHonda C125 ឆ្នាំ២០១៨ ស្លាកលេខភ្នំពេញ 1GP-6929ដែលបានទុកមុខបន្ទប់ដេក ហើយស្រែកហៅជនរងគ្រោះដែលបុគ្គលិកធ្វើការផ្ទះសំណាក់ តែមិនឃើញឃើញឆ្លើយតប ទើបឆែកកាមេរ៉ាសុវត្ថិភាព រួចឃើញមានជនសង្ស័យ០២នាក់ ដែលមកស្នាក់នៅបន្ទប់លេខ៧ បាននាំគ្នាកាត់សោរច្រវ៉ាក់ម៉ូតូ លួចយកទៅបាត់ ហើយក៏ទៅមើលបន្ទប់លេខ៧ ឃើញចាក់សោរ បានយកសោរមកចាក់ចូលឃើញ ក៏ឃើញជនរងគ្រោះដេក ស្លាប់លើគ្រែ ដោយមានកន្សែង ចងរុំមុខ យកខ្នើយដាក់ពីលើមុខ។

បន្ទាប់មកម្ចាស់ផ្ទះសំណាក់ ក៏បានរាយការណ៍ប្តឹងសមត្ថកិច្ច ចុះមកពិនិត្យដល់កន្លែងកើតហេតុតែម្តង។

ករណីនេះសមត្ថកិច្ចកំពុងស្រាវជ្រាវបន្ត ចំណែកសពជនរងគ្រោះបានប្រគល់ជូន ម្តាយជនរងគ្រោះធ្វើបុណ្យតាមប្រពៃណី៕