នៅថ្ងៃទី១១ ដល់ថ្ងៃទី១៤ ខែមករា ឆ្នាំ២០២១ខាងមុខនេះ រាជធានីភ្នំពេញ សីតុណ្ហភាពអាចនឹងធ្លាក់ចុះរហូតដល់រង្វង់ ១៦អង្សាសេ។ នេះបើតាមការប្រកាសរបស់ក្រសួងធនធានទឹក និងឧតុនិយម នៅព្រឹកថ្ងៃទី៨ ខែមករា ឆ្នាំ២០២១នេះ។
ជាមួយគ្នានេះដែរ តំបន់ជួរភ្នំដងរែក និងតំបន់ខ្ពង់រាបភាគឦសាន សីតុណ្ហភាពនឹងអាចធ្លាក់ចុះមកក្នុងរង្វង់ពី ១១ ទៅ ១៣អង្សា លាយឡំជាមួយនឹងខ្យល់ខ្លាំងផងដែរ។
សម្រាប់តំបន់មាត់សមុទ្រវិញ សីតុណ្ហភាពនឹងអាចធ្លាក់មកនៅក្នុងរង្វង់ពី ១៧ ទៅ១៩អង្សាសេ ហើយនៅថ្ងៃទី១២ ខែមករា នៅលើផ្ទៃសមុទ្រមានខ្យល់បក់បោកខ្លាំង និងរលកសមុទ្រខ្ពស់ៗ។
តាមការបញ្ជាក់របស់ក្រសួងធនធានទឹក ស្ថានភាពបែបនេះ គឺដោយសារតែ ទ្រនុងសម្ពាធខ្ពស់ពីភាគខាងជើង បានធ្លាក់ចុះមកក្រោម ដោយនាំមកនូវធាតុត្រជាក់ពីតំបន់ស៊ីប៊ីរី គួបផ្សំជាមួយនឹងខ្យល់មូសុងឦសានខ្លាំង។
ជាមួយអាកាសធាតុត្រជាក់នេះ ក្រសួងស្នើដល់ប្រជាជន ពិសេសវីរៈកងទ័ពដែលរស់នៅ និងឈរជើងនៅតំបន់ជួរភ្នំដងរែក និងខ្ពង់រាបឦសាន សូមបង្កើនការយកចិត្តទុកដាក់ថែរក្សាសុខភាព។ ដោយឡែកប្រជានេសាទ និងអ្នកធ្វើដំណើរតាមសមុទ្រទាំងអស់ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
0 Reviews:
Post a Comment