(ភ្នំពេញ)៖ ពហុកីឡដ្ឋានដ៏ធំរបស់ប្រទេសកម្ពុជា ឈ្មោះ មរតកតេជោ ត្រូវលើកពេលនៃការបញ្ចប់ការសាងសង់ ដោយអាចនឹងត្រូវបញ្ចប់ជាស្ថាពរនៅពាក់កណ្តាលឆ្នាំ២០២១។ នេះបើតាមការបញ្ជាក់របស់លោក វ៉ាត់ ចំរើន អគ្គលេខាធិការ គណៈកម្មាធិការជាតិរៀបចំស៊ីហ្គេមឆ្នាំ២០២៣ (CAMSOC )។
តាមលោក វ៉ាត់ ចំរើន ថា ក្រុមហ៊ុនសាងសង់បានបញ្ជាក់ថា អ្វីៗនឹងបញ្ចប់ការសាងសង់នាខែឧសភា ឆ្នាំ២០២១ ដោយសារតែក្រុមហ៊ុនសាងសង់ត្រូវការពេលវេលាបន្ថែម ក្នុងការបំពាក់កៅអី កញ្ចក់ការតុបតែងផ្សេងៗជាពិសេសគឺការតុបតែងផ្នែកខាងក្នុងកីឡដ្ឋានធំ ដូចជាទីលានបាល់ទាត់ ទីលានរត់អត្តពលកម្ម សណ្ឋាគារ បន្ទប់ VIP ។ លោកសង្ឃឹមថា នៅពាក់កណ្តាលឆ្នាំ២០២១ ពហុកីឡដ្ឋានដ៏ធំនេះនឹងបញ្ចប់ការសង់សង់ទាំងស្រុង ហើយនៅឆ្នាំ២០២២ កម្ពុជានឹងត្រៀមបើកសម្ពោធការប្រកួតកីឡាជាតិលើកទី៤ នៅពហុកីឡដ្ឋានជាតិមរតកតេជោនេះតែម្តង។
បើតាមការបញ្ជាក់របស់លោក វ៉ាត់ ចំរើន ភាគីចិនបានបញ្ជាក់ច្បាស់អំពីគុណ និងសក្តានុពលនៃបច្ចេកវិទ្យាចុងក្រោយសម្រាប់ការសាង់ពហុកីឡដ្ឋានជាតិមរតកតេជោ ដែលនេះជាគម្រោងដ៏ធំរបស់ភាគីចិនសម្រាប់ការងារក្រៅប្រទេសរបស់ខ្លួន។
សូមបញ្ជាក់ថា ពហុកីឡដ្ឋានជាតិមរតកតេជោ ត្រូវបានស្ថាបនាឡើងក្រោមជំនួយឥតសំណង់របស់ប្រទេសចិន សម្រាប់ប្រើប្រាស់ក្នុងពិធីបើក បិទ នៃព្រឹត្តិការណ៍ស៊ីហ្គេម ឆ្នាំ២០២៣ខាងមុខ ដែលកម្ពុជានឹងធ្វើជាម្ចាស់ផ្ទះ៕
0 Reviews:
Post a Comment