ទន្លេ ស្ទឹង បឹងបួរជាសម្បត្តិរដ្ឋ ប្លែកអ្វីស្ទឹង នៅភូមិជ្រោយស្នោរសង្កាត់ព្រែកជ្រៃ ក្លាយជារបស់ឯកជនតាំងពីពេលណា? ហើយស្ថាប័នណាចេញច្បាប់លក់ដូរអោយជនទុច្ចរឹតទាំងនោះ?

សូមអានបន្ត

ខេត្តកណ្តាល ÷ ក្នុងពេលបច្ចុប្បន្ននេះ កំពុងតែល្បីរន្ទឺសុះសាយពេញទាំងផ្ទៃប្រទេស ពាក់ព័ន្ធនិងករណី ការប្រកបរបរនេសាទ ដោយប្រើឧបករណ៍ខុសច្បាប់ផ្សេងៗ ដូចជា ឆក់ ដាក់ស្បៃមុងម៉ាឡេ និងហ៊ុំសម្រាស់ជាដើម ។ល។ ដោយអំពើទុច្ចរិតខុសច្បាប់ទាំងអស់នេះបានក្លាយទៅជាប្រធានបទក្តៅគគុកនៅក្នុងខេត្តកណ្តាលទាំងមូល។ 

 ដោយឡែកងាកមកមើលស្ទឹងមួយដែលជាសម្បត្តិធនធានធម្មជាតិរបស់រដ្ឋ ដែលស្ថិតនៅក្នុងភូមិជ្រោយស្នោរ សង្កាត់ព្រែកជ្រៃ ក្រុងសំពៅពូន ខេត្តកណ្តាលឯណេះវិញ កំពុងតែបានប្រែក្លាយជាស្ទឹងរបស់បុគ្គលឯកជនផ្តាច់មុខ ដោយមិនដឹងថាស្ថាប័នពាក់ព័ន្ធណាមួយ ហ៊ានចេញលិខិតស្នាមលក់ដូរនោះឡើយ។

មានសេចក្តីរាយការណ៍មកថា ចំពោះផលនេសាទនៅក្នុងផ្ទៃស្ទឹងទាំងមូល ត្រូវបានលោកខុមប៊ុនធឿនអនុភូមិជ្រោយស្នោរហើយមានតួនាទីជាប្រធានសហគមន៍ជ្រោយស្នោរ បានឃុបឃិតផ្សំគំនិតនិងមន្ត្រីជំនាញជលផល បើកដៃឲ្យជនជាតិវៀតណាមដាក់សម្រាកតាមស្ទឹងក្នុងមួយដុំ ៦,លានដុងក្នុងមួយរដួវ ស្មើរនិង៩០ម៉ឺនរៀលដោយមិនដឹងថាយកលុយនោះទៅប្រើប្រាស់អ្វីនោះឡើយ។

 ប្រជាពលរដ្ឋដែលអាស្រ័យផល ក្នុងស្ទឹងនោះបានរៀបរាប់ថា នេះគឺជាយុទ្ធសាស្ត្រខ្ចីដៃប្រជាពលរដ្ឋ ប្រើដើម្បីផលប្រយោជន៍បក្សពួករបស់ខ្លួន ប្រជាពលរដ្ឋដែលរស់នៅក្នុងភូមិជ្រោយស្នោរបានលើកឡើងថាពួកគាត់មិនដែលទទួលបានផលពីសហគមន៍ឡូនេសាទជ្រោយស្នោរឡើយ។ ចំពោះលោកខុមប៊ុនធឿន អនុភូមិហើយមានតួនាទីជាប្រធានសហគមន៍បានប្រាប់អង្គភាពយើងថា ចំពោះលុយកាក់ដែលបានលក់ផលនេសាទក្នុងស្ទឹងនេះគឹលោកយកលុយមកផ្គត់ផ្គង់សហគមន៍ ។

 តើលោកខុមប៊ុនធឿនបានគោរពតាមបទបញ្ជាផ្ទៃក្នុងរបស់ក្រសួងរុក្ខាតប្រមាញ់និងនេសាទដែលបានដាក់ ជូន ត្រូវដាំដើមរាំង ដាំដើមត្រោះការពារព្រៃលិចទឹក រក្សាទុកតំបន់អភិរក្សទុក្ខកន្លែងត្រីពងកូន តើលោកខុមប៊ុនធឿន បានអនុវត្តតាមក្រសួងរុក្ខាប្រមាញ់និងនេសាទហើយឬនៅ តើតំបន់ណាជាតំបន់អភិរក្សបើលោកខុមប៊ុនធឿនប្រធានសហគមន៍លក់គ្មានសល់សូម្បីតែនៅមុខរបាំង រីឯព្រៃលិចទឹកនៅមុខរបាំងត្រូវគេកាប់បំផ្លាញយកមកដាក់សម្រាកអស់ទៅហើយ ប្រជាពលរដ្ឋបានលើកឡើងថា ពាក់ព័ន្ធនឹងករណីលក់ផលនេសាទឲ្យជនជាតិវៀតណាម ប្រហែលជាមានពាក់ព័ន្ធនិងលោកអេងសុចិត្រ និងលោកសិមម៉ាលីនាយផ្នែកជលផលក្រុងសំពៅពូនហើយមើលទៅទើបអ្វីៗប្រព្រឹត្តទៅបានយ៉ាងរលូនដូច្នេះ។ 

ចំណែកលោក ហេងសុភារិទ្ធនាយខណ្ឌរដ្ឋបាលជលផលអង្គភាពយើងក៏មិនអាចសុំការបំភ្លឺបានដោយគ្មានទូរស័ព្ទ ទោះជាយ៉ាងណាប្រជាពលរដ្ឋទទូចស្នើរសុំដល់អាជ្ញាធរពាក់ពន័គ្រប់លំដាប់ថ្នាក់ក្នុងខេត្តកណ្តាល ពិសេសឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល មេត្តាមានវិធានការចាត់កំលាំងក្រោមឱវាទ ចុះស្រាវជ្រាវពាក់ព័ន្ធករណីខាងលើផងទាន! ទោះជាយ៉ាងណាអ្នកសារព័ត៌មានគ្រាន់តែជាកញ្ចក់ឆ្លុះបញ្ចាំងពីសង្គមពិត ចូលរួមចំណែកជាមួយរាជរដ្ឋាភិបាល អង្គភាពសារព័ត៌មានយើងចាំទទួលបំភ្លឺ បកស្រាយគ្រប់ម៉ោងធ្វើការ តាមរបបស្តីពីសារព័ត៌មាននៃព្រះរាជាណាចក្រកម្ពុជា សូមអរគុណ៕